الصدر ضايق وانت ضيقت صدري
وانا معك من غير وجهة وتحديد
ياكثر ماتجرحني ويزيد صبري
كنك تقول ازيد واقولك زيد
تقول ياعمري واقول انت عمري
كني وراك اسمع وش تقول واعيد
احيان اسولف فيك واحيان اهذري
كني اسوي للأحاسيس تجديد
مراح تلقا صدق واحساس كثري
وان كان ماانت مصدق اعطيك تأكيد
غنيت لك ياللي على البال تطري
وانا من يدين الصبر للمواعيد
ورجعت اغني فيك ماعاد بدري
لو وقفت دونك سلوم وتقاليد
اشفق على صوتك مع الليل واسري
حتى وانا جالس بوسط الاجاويد
ياصاحبي غزيتني غزو فكري
واصبحت تحكمني وانا مااقدر احيد
مو بس احبك إلا سلمتك امري
ناقص تجي وتحط بيديني القيد
صرت أتمنى بس يعجبك شعري
حتى لو انه ماعجب زيد وعبيد
من وين أببدأ فيك والوصف يغري
نور الليالي واحتفالية العيد