بسم الله الرحمن الرحيم
السلام عليكم ورحمة الله وبركاته
ان شاء الله تكونو بخير وصحة وسلامة
كل عام والجميع بخير
انا جديدة في المنتدى
اترددت كتير قبل لاأكتب بس اتوكلت على الله ونويت اكتب ولعل الله يفيدني
انا بنت عمري 20 سنة ليا مخطوبة من شهرين وكم تقريبا وان شاء الله العمر كله
خطيبي والحمد لله طيب وعاجبني ومقتنعة فيه ولله الحمد
ماعرف كيف ابدأ او اقول اللي بحس فيه بس حكتب وأمري لله
تضايقني أشياء منه
________________
احس انه نفسي يهتم فيا اكتر يفكر فيا اكتر ابغى احس اني مالكته
شاغلة تفكيره
يهتم فيا بس مو كتير و يتصل بس مو كتير يعني عنده اوقات معينة في اليوم يتصل فيها مرتين ممكن مرة اول اليوم ومرة في اخر اليوم ممكن
4 مرات بالكتير على حسب الظروف
_ عموما هوا من الرجال اللي كلامهم قليل ومايحب يتكلم بالجوال_
وبرضو انا من النوع اللي كلامي قليل نسبيا ومع خجلي منه بسكت كتير وبرضو عموما مااتكلم كتير بالجوال _
بس نفسي اعيش فترة الخطوبة يكلمني كتير احس بلهفته عليا واهتمامه فيا ويرسلي مسجات بس مو كتيير انا برسله مسجات مرة اكتر منه وتقريبا انا اللي ببدأفي المسجات واحسها حلوة يعني بكتبله اللي في قلبي
____
قلي انه يحبني بس نفسي اسمعها كتيير
احيانا اتعمد ارسله في نهاية المسج احبك .. احيانا اندم واحيانا اقول احسن
ماعرف التصرف السليم
بس انا نفسي اسمع منه كلام حلوو يخليني احس بوجودي في حياته
لمن اشوفه احس انه يحبني مسكة يدينه بنظرة عينه بحضنه
بس انا نفسي اسمع منه حب نفسي مرررررة
عموما كلامنا مع بعض مافي ولا شي عن الحب ولا المدح ولا الدلع
وأنا لما اشوفه احاول اني اكون في احلى صورة واحلى ملابس
والحمد لله بحس بنفسي اني لفت نظره بس هوا مايعلق على لبسي ولا على شكلي
_ وانا بصراحة متعودة من بابا على الدلع لو لبست اي شي لازم يدلعني ويمدحني
فنفسي انه خطيبي يمدح فيا ويدلعني
_أمي تقول انه ده الشي خطيبك ممكن يكتسبه بس انا مااعرف كيف اخليه كده _
واللي احسه منه انه هوا مايعرف كيف يدلعني ولا يمدحني احسه ولله الحمد ماعنده خبرة في البنات نهائيا
وبالاضافة لكده انه ماعنده اخوات يعني بالمرة مااتعامل مع بنات قبل كده
__________________
ماعرف لوطبعه حيفضل كده دايمااا
أو عشان في البداية ماعرف
_امي تقلي انتي تعوديه على الاشياء اللي انتي تحبيها وتبغيها منه _
بس انا مااعرف ماعندي خبرة ولا تجربة
في مرة سألته بعدين في المستقبل حتهتم فيا أكتر ؟؟
سكت وقلي يعني انا مابهتم فيكي ؟؟
انتي بتحطميني
فاجأني جوابه
هوا حاسس نفسه بيهتم فيا كتير
ماعرف ايش اساوي وكيف اخليه يهتم فيا اكتر كيف اخليه يمدحني وكيف اخلي يدلعني
انا بطبعي عاطفية كتير ورومانسية واحب احد يدلعني
واصلا البنات بطبيعتهم يحبو باذانهم
والرجال يحبوو بعيونهم
يعني انا محتاجة اسمع منه كلام عشان احبه اكتر وقلبي وعقلي يتملى ومايحتاج احد غيره
ده موضوعي خاص وحساس بالنسبة ليا
رجاء للي عنده نصيحة ليا ممكن اقدر اجزبه ليا اكتر واخليه يهتم فياا
ابغاه مجنون فيا او ممكن لاي احد لو حاله زي حالي
او من الرجال اذا سمحتم فانتو اكيد تعرفو طبع بعض
يعني افيدوني افادكم الله
واتمنى الموضوع يفضل في المنتدى يعني محد ينقله
وجزاكم الله خير جميعااااااااااا
واعذروني على الاطالة
متأملة فيكم خير