السلام عليكم ورحمة الله وبركاته
اخواني واخواتي الاعزاء كيف حالكم ؟؟؟
أتمنى انكم تكونوا بتمام الصحه والعافيه ...
المهم ما بطول عليكم وبدخل في الموضوع على طوووول ....
سلمكم الله مليت و طفرت من طبع زوجي و ابتعاده عني وعن ولده ...
أحس اني عايشه حياتي لوحدي و مربية ولدي لوحدي و أصرف على نفسي وولدي لوحدي لاني موظفه وعندي راتبي ...
بس بصراحه فعلا احس اني وحيده في هالدنيا ...
زوجي الله يصلحه ويهديه مدمن على التدخين وبالاخص الشيشه وبشكل فظيع ...
تخيلوا يطلع من البيت الصبح للدوام ومن بعد الدوام على طووول يروح على المقهى ويقعد مع ربعه لآخر الليل ابدااا ما يرجع البيت...
لين بالليل .. وهكذا حياته بس يرجع البيت للنوم وطبعا انا لو اكون تعبانه انتظره لاني لو ماشفته بالليل وهو راجع ..
ما بشوفه طول عمري .... جربت كل الطرق وياه .. حاولت احسسه انه ولده يفتقده ودايما يسأل عنه ...
ويوعدني اني بيرجع بوقت وبيقعد وياه لكن للأسف بس كلااام على الفاضي ...
حاولت اغير من البيت و من شكلي و لبسي وكل شي ....
رحت شريت أحلى وأرقى وأكثر الملابس اغراء وطبعا هو ينبسط يوم يشوفني ويمدحني بس بعد ما يتغير ويرجع آخر الليل ...
أكثر من مره اقوله انا عازمتك على العشا ويانا اوا الغدا .. ويقوللي انا احين مشغول ما اقدر ايي خليها لين ارجع ...
صبغت شعري و غيرت وايد من شكلي علشانه وبعد ما تغير هالطبع اللي فيه ...
اكثر من مره اكلمة واقوله انا محتاجتنك وياي و ولدك محتاج لك ولااازم تربيه وياي علشان يحس فيك ...
بس للاسف ما في احسااااس ... مع انه يعترف يوم اكلمه انه مقصر وانه خلاص بيتتغير وبيحاول يرجع بوقت لكن...
لا حيااااااة لمن تنااادي .....
صرت اشك فيه وبتصرفاته ... والله صرت اوسوس واحس انه في الموضوع شخص مااا ... لانه فعلا هالايام محد يثق بحد !!
اتصل به على فترات متقطعه واكلمه ويكون فعلا مع ربعه لاني اسمع اصواتهم ؟؟
و حاليا فاتح له مشروع ايديد وهو طبعا مدمن مشاريع وكلها بخسااااره طبعا .. ولا يفيد النصح وياه ؟
ويصرف كل اللي يقدر عليه على هالمشاريع اللي توديه بداهيه و غرق عمره بالديون للاسف ...
وهالشي طبعا اللي خلاني استقل بنفسي واشتغل لاننا وصلنا لحالة ما يعلم بها الا رب العالمين ...
و لانه ولدي كسر خاطري و حسيت فعلا انه بنوصل لمستوى ما نحصل فيه لقمة ناكلها فقررت اشتغل والحمدالله ربي رزقني
بالوظيفه اللي اقدر اعيل نفسي وولدي وبيتي منها .. وترى حتى هو ما اقصر وياه لانه كل راتبه على الديون للأسف ...
بس والله مليت من هالعيشه ... اكثر من مره افكر انفصل عنه لاني ما احس بوجوده نهااائيا ..
و ولدي صار عمره ثلاث سنوات تقريبا وكل همه علي انا وبس ... وكل ما افكر اييب غيره اتردد الف مره ...
لاني فعلا اخاف ننفصل بيوم و يضيعوا العيال بيننا ...
ما اعرف شو اسوي بحياتي والله مليت مليت مليت ...
كل شي تتخيلونه جربته لدرجة انت عفت نفسي والله وعفت كل شي واحس كله نفسيتي تعبانه و ضايجه ومهمومه ...
كرهت كل شي والله .. الا ولدي فديته عسى الله يحفظه ويخليه حقي ....
تخيلوا مره ولدي قاعد وتذكر ابوه ... قاللي انا ما احب بابا بس احب ماما ...
قلت له لا حبيبي عيب ما تقول هالكلام مره ثانيه بابا يحبك وانت بعد لازم تحبه ..
قال بابا ما يحبني .. بابا كله يروح عني الدوام ... مسكين على باله ابوه كله في الدوام من الصبح لليل ...
طبعا ما بقول حق طفل صغير ابوك في المقهى يشيش مع ربعه ....!
وقلت حق زوجي طبعا هالكلام وفي اليوم الثاني رحت اشتريت العاب لولدي و حطيتهم بكيس ...
واتصلت بزوجي وقلت له بلييييييييز علشان خاطري اليوم تعال مع ولدك واقعد وياه اشوي ...
وقلت له تراني شاريه العاب حقه وبخلي الكيس حقك وانت عطها اياه يوم بترجع على اساس انها منك انت ..
وقال ان شاء الله ... ولم يشأ الله .... طبعا ما رجع كالعاده بس كلام يسكتني فيه ....
و انتظرت انه ايي اليوم الثاني والثالث ولكن ... لا حياة لمن تنادي و طلعت الالعاب من قهري وعطيتهم لولدي بنفسي ...
والله ما اعرف شو اسوي وياه .. احس المسافه بينا تكبر كل يوم اكثر واكثر ...
صح انه يخبرني بعض الامور اللي سواها في يومه بس بعد احس اني بعيــــــــــده عنه وهو بعيد عني ...
لدرجه اني ما اقدر اشكي له ... طبعا ما بشكي ابدااا لاني ما اشوفه غير وقت قصير وطبيعي ما بقضيه بالشكاوي ...
للعلم تراه يستمتع وياي بكل شي ... ويعجبه فيني كل شي وهذا بشهادته ... شكلي وطبخي و كلامي و اسلوبي ...
لكن ليش هو بعيد عني ما اعرف ؟؟؟؟؟:sa7l. (33):
بلييييييييييز شوفولي حل والله مليت من هالعيشه واحس نفسيتي تعبت خلاااااص ما اتحمل ...
و عسى الله يبعد عنكم الهموم ويسعدكم دنيا وآخره ...
واسمحولي على الاطاله ....