بسم الله الرحمن الرحيم
السلام عليكم ورحمة الله وبركاته
أسعد الله أوقاتكم بكل خير
أحبابي قصتي طويله عريضه ما تتحملها الجبال ولكن لا أقول إلا الحمد لله على قضائه وقدره
لعل الكثير من المشرفين والمشرفات يعلمون بقصتي السابقة مع زوجتي الأولى
إنتهت العلاقة بيننا بأمر قضائي من المحكمة وتزوجت والله يستر على عباده كل واحد راح بطريقه
تزوجت بأخرى أسأل الله أن يصلح حالي وحالها
بكل أمانه ما أقول فيها الا كل خير
لكن المشكله حدثت ليلة البارحه حيث أن أبنائي من زوجتي الأولى يعيشون معي في البيت
الأولاد الله يصلحهم جلسوا قرابة 4 سنوات مع أمهم ولا شافتهم عيني خلال هذه الفتره
وإذا جينا ننام الأولاد يبكون ما يبون يجلسون لحالهم وحنا نايمين
فقلت لها البارح بخلي الأولاد ينامون معانا في الغرفه مع أخواتهم
وياليييييت ما قلته
أنا والله ما قلته إلا من خوفي على أبنائي يصير فيهم شي من البكاء والخوف
المهم الحرمه الله يهديها ما مداني أقول لها ذا الكلام إلا وقامت تصايح وترفع صوتها
قلت لها يا بنت الناس الأولاد لا يجيهم شي من الخوف والبكاء
قامت تصايح زياده وتقول إذا منت واثق فيني وتخاف اني اسوي فيهم شي ليش تجيبهم ومن ها الكلام
قلت لها تعوذي من ابليس وصوتك لا يرتفع علي
قمت وديت الاولاد غرفتهم وقلت بنام عندهم وأيضا يا ليتني ما سويت اللي سويته
راحت وأتصلت على أمها بدون ما ادري وأنا نايم
ولا دريت الا وامي تدق علي تقول وش اللي صاير عندكم
قلت ولا شي / قالت الوالده أم زوجتك دقت علي وتقول كيت وكيت وكيت
قلت لها أنا لا دقيت ولا شي هذا انتي دقيتي وانا نايم والمفروض شي صار بين 4 جدران تبقى بينها
الوالده بينت لها اللي صار قالت تعوذوا من الشيطان هذا ابليس دخل بينكم ومن ذا الكلام
روحت لزوجتي الا وهي تكلم امها قلت لها ومن قال لك تدقين على امك
وترفع صوتها على وامها تسمع / قلت لها صوتك هذا زاد عن حده وهذي قلة أدب
ولا دريت الا واخوها دق علي يقول ترانا جايين
قلت له والله اذا جيتم مالكم الا الحشمه والكرامه ولاهي رايحه معاكم
أنا مادقيت عليكم ولا قلت تعالوا مشكله تحصل في كل بيت أنا ما أدخل الأهل فيها والله يستر عليكم لا تجون
بعد ما قفلت ناديت زوجتي في المجلس وحوار دام ساعتين والله طلعت أسبابها واهيه
أيضا هديت الوضع وقلت لها روحه منتي رايحه وأهلك ما احد بيجي الا اذا بيجون زياره حياهم الله
من احد الاسباب للأمانه اللي قالته ( إني دايما جالس في المجلس )
وهي صادقه لأني إنسان مدخن ولا أدخن في البيت داخل وجالس في المجلس والباب ما عمره تقفل
دايما الأولاد والحرمه والبنات موجودين عندي ونتكي ونسولف لكن أخذت هذا العذر سبب
المهم الحين الحرمه الله يصلحها ما عندها الا تبي تروح بيت اهلها وش الحل؟