فمان الجرح لا والله فمان أحزاني الكبرى
فمان أغلى ثلاث سنين مت بها عشان أعيش
فمان الحب وأحلام القلوب البيض والخضرا
فمان الآه من كثر الزعل والشوق والتطنيش
فمان عيونك اللي مالها بين العيون أخرى
فمان غرورك اللي علم الطاووس نفش الريش
فمان عطورك اللي تسكن أنفاسي وبالأحرى
فمان أنفاسك اللي تسكن عطوري ولا أدري ليييش؟!
فمان الليل وأحضان الدفا ومصافح القمرا
فمان الباب والشباك وأيام الصبا والطيش
فمان التوت والرمان وأحلى فاكهه حمرا
فمان الضحكه اللي كنها من مبسمك بخشيش
فمان غيابك اللي ماترك لمواصلك بشرى
فمان الشك وظنون الخطا والكذب والتشويش
فمان العيد كني به يجيني وحالتي تزرى
يطبطب فوق أكتافي حزن ويقول لي ماعليش
فمان الجوع وإحساس العطش ومفارقك صحرا
تعبت أفتش دروبك قهر وأضناني التفتيش
فمان ضلوع مكتوب على أحزانها اليسرى
هنا توجد جروحي لو تكرمتي بلا تنبيش
فمان دموع لا تغني ولا تسمن من الذكرى
وأنا اللي ماقدرت أطلع من أجوائي معك بشويش
فمان الشاعر اللي يجمع بتجربته الصغرى
شعر بدر ورمنسية نزار وفلسفة درويش
فمان الخوف ويدينك سجن وكفوفي الأسرى
وأنا فيني من الإحباط مايكفي هزيمة جيش
فمان أشياء ماتنقال للعالم ولا تطرى
ممالك حب دمرها الأسى وسياسة التطفيش
فمان الإيش ماأدري ولكن الزمن أدرى
وأنا اللي ضاع مايدري حبيبه ضيعه لجل إيش؟!
فمان الله ياقلبي وجرح مانوى يبرى
كتب ربي علي أعيش من دونك وأنا ماأعيش!!