حتى وردني تالي الليل اتصال !!
وأنا على شاهي وبسكوت ديمه ..
الرقم بايخ لكن الصوت قتال
كنه مثل صوت المذيعه حليمه ..
قالت مساء الخير ياطيب الفال
قلت أرحبي ترحيبه مستديمه ..
بالعود والصفري ودلة وفنجال
وأجيك يابنت الأصول الكريمه ..
وردت بضحكه ثم قالت كيف الحال ؟؟
قلت أشهد إن الحال عقبك سقيمه ..
قالت وهي تضحك بعد مثل الأطفال
وأنا بعد كني بدونك يتيمه ..
من يوم قالتها تزلزلت زلزال
من فجعتي كني مسوي جريمه ..
قلت أرفعي صوتك تري مافي أرسال
كذااب .. لكن المصيبه عظيمه ..
قالت أقول أسمع ترى هرجنا طال
ممكن تصاحبني تراني وسيمه ..
وأسمي الحقيقي أول حروفه الدال
لكن يسموني بين البنات بالزعيمه..
صحيح أحب الفخفخه وأعشق المال
لكـن .. تراني طاهره ومستقيمه ..
ماعندي أمغازل ولا(لعب يهال)
ماعندي إلا في الشرف والحشيمه ..
بس الصراحه قلبي لشوفتك مال
وأصبحت وحدك جالس في صميمه ..
فكر بعقلك وأترك القيل والقال
وأحذر تطيع أهل العقول العقيمه ..
وأرسل علي الحين خمسميه ريال
أشحن بها جوال أختي بثينه ..
أو طقم غالي فيه خاتم وسلسال
أروح به في عرس ولآ عزيمه ..
قلت الحقيقه ماني رجل أعمال
ولاني بتأجر والموارد عديمه ..
أنا الصراحه شبه عاطل وبطال
وعلاقتي بالفقر جداً حميمه ..
والراتب الله يرحم الحال مازال
محدود والمصروف ربي عليمه ..
والدين بـالآلاف والبنك شغال
يأكل فلوسي بالربا والظليمه ..
والسوق طايح والغلآ ضيق البال
والموت والله صاير أكبر غنيمه ..
قالت تحمل بس والحمل ينشال
خلك شديد الباس صلب العزيمه ..
يأخي تصرف جعلك اتصير نشال
أهم شي إن النوايا سليمه ..
لابد تفهمني على كل الأحوال
ما دمت من أهل العقول الفهيمه ..
قلت إيه والله فاهم اللي على البال
لكن ترى هذي علينا قديمه ..
يابنت هذا صاير اليوم موال
اللي تبي تلعب علي ابن اللئيمه ..
يابنت ماتدرين كم فيه محتال
يلعب على الحلبين وأنتي غشيمه ..
يابنت كم من جاهله دمعها سال
من عقب ما جات العواقب وخيمه ..
والبنت لا اقتفى عرضها بيد الأنذال
والله مايبقى لها أي قيمه ..
قالت تبي ولا فـخلك على هالحال
ماهو بناقصني نصـايح حكيمه ..
عز الله إنك للأسف منت رجال
وأنك قليل الذوق مافيك شيمه ..
يا لعنبو اللي مايسطرك بنعال
حتى يعلمك الغزل يا بهيمه ..
( تفـو)عليك وصكت الخط في الحال
مدري( تفو)هي مدح ولآ شتيمه ..!!
هههههههههه
راقت لي فأحببت نقلها لكم