هذي قصتي وارجو مساعدتي
السلام عليكم ورحمة الله وبركاته
ارجو افادتي بما هو مناسب وايجاد حل لمشكلتي
يمكن اتكلم بالعامية فسامحوني
انا حصل وياي موقف البارحة مع زوجتي ( بس نحن بعدنا في الفترة اللي بين الملكة والعرس وباقي شهرين بنعرس ) المهم نحن قررنا نلعب لعبة وسميناها الصراحة يعني كل واحد يصارح الثاني ويخبره بكل اللي سواه قبل سواء كان زين هالشي او مب زين
وبدون زعل وبدون ضيق وما حد يشيل فخاطره على الثاني وكلام الليل يمحوه النهار.
انزين وبدينا انصارح بعض وبدت هي بالاول بس الاشياء اللي صارت وياها كلها زينه لانها دينه
وعقب بديت انا ....... انا المعروف عني اني انسان دين وانا اصلا كنت دين ..... وبديت اخبرها بموقف صارلي قبل الملكة بثلاثة اسابيع
الموقف هو : انه يداومن وياي بنات فالدوام وانا كنت مسؤول عن توزيع الدوام واعطاء كل واحد مهامه
( ما بطول عليكم بختصر السالفة ) وحده من البنات اعجبت فيني وتحاول تتقرب مني كانت تتصل من مكتبها على مكتبي وتحاول تسولف وياي ...... المهم الشيطان وربعه (اللي هم رفقاء السوء) خدعوني وقمت آخذ واعطي ويا هالبنت واتكلم وياها عالتلفون لكن انا كنت شوي ما مرتاح المهم بدت تواعدني فمكان وانا اييها ونسير مع بعض بس ما كنا نسوي شي كنا بس نسير نشرب شاي ونلف بالسيارة شوي وعقب ارجعها لسيارتها وكل واحد يروح
طلعنا ويا بعض يمكن ثلاث او اربع مرات بس .... وما كنا نسوي اي شي ابدا بس نلف بالسيارة ... بس مرة من المرات عطتني بوسة على خدي وبستها على خدها ... وكنت دايما اكلمها عن زوجتي اللي بتزوجها وكنت امدح زوجتي واايد قدامها واقولها اني احب زوجتي وما احبها ... مع مرور الايام البنت طفرت وهجرتني وقالت خلاص لا نعرف بعض واللي بينا انتهى .. انا قلت بصراحة هم وانزاح ... بس الحمدلله اني ما سويت اي شي غلط وياها فير اني بستها على خدها وبس ...
فيوم سمعت زوجتي السالفة صاحت وقالت الحين بين شكثر تحبني .. يعني ما فكرت فيني حتى .. وقالت لو انه ما متفقين بدون زعل كان زعلت وااايد وبطلب الطلاق بعد .. كيف تقول تحبني وتخونني .. وانا ما توقعتها منك وقالت كلام وااايد حتى انا تميت اصيح وااايد
المهم الخين زوجتي تغيرت شوي عليي .. ما تقولي حبيبي واحبك ولا تقولي الكلام الحلو اللي تعودت عليه وتقول انا مالي خص فيك ولا بسالك عن شي ولا بحاتيك ولا شي
بس والله اني ما سويت اي شي غلط ويا هذيك البنت
ابا مساعدتكم ونصيحتكم وكيف اتصرق وكيق ارجعها نفس اول ... لاني حاولت افهمها واقولها اني احبها وما حبيت غيرها وهذيك البنت كان طيش شباب والشيطان لعب بعقلي بس هي خلاص حطت فبالها اني ما احبها وكل كلامي كان بس كذب
بس انا كنت اريد اخبرها السالفة من زمان بس خفت من ردت فعلها ... لين لعبنا هاللعبه وشرطها بون زعل ... فاستليت الفرصة وقلتلها بس للاسف تغيرت عليي
فارجوكم ساعدوني لاني ما اقدر اعيش بدونها
وسامحوني اذا طولت وارجو الرد على موضوعي وشكرا لكم
السلام عليكم ورحمة الله وبركاته