اليوم انا جايبة لكم طريقة تقدرين تبدعين فيها ... وتتركين بصمة الانوثه على كل شي حولك ...
ممكن تسوين بهالطريقة حافظة بطاقة البنك ،اوراقك المهمه ،صورك ،سجلات ،فواتير ..... الخ
ما اطول عليكم نبدا باسم الله بس بليييز (( اذكروا الله ))
الطلبات : ورق مدري وش اسمه (اظن ورق حراري) بس الي اذا تعرض للحراره يقسي تلقونه فالمكتبات او فمحلات تصوير الاوراق
حطيت لكم المحفظه عشان ابين لكم هو من طبقتين ..مقص . بطاقتك حقت الصراف
مجلات او صور تطبعينها من النت .. اييي صور ان شاء الله صور عيالك : )
راح نتصفح المجله واي صورة تعجبك قصيها بشكل عشوائي وحطها على جنب
راح ناخذ الصورة ونحط فوقها بطاقة الصراف ونرسم تحديد بخط مرسام خفييف الحدود .. ونقص خارج الحدود ..
ننسق الصور على مزاجنا كل ثنتين مع بعض
نحطهم فوق بعض وبهدووء نثبتهم فحافة الورق الحراري ونسكره بهدوووء
راح نفتح المجله من النص .. نحط الورق وسطها ونقلب فوقه 3 ورقات ونكوي بالمكوى بضغط قوي وفي اتجاه واحد
نفك نشوف اذا زبط تمام واذا مازبط نعيد فاتجاه واحد بقوة ..وفنفس الوقت بهدوء
نسكر المجله ونحط فوقها شي ثقيل 4 دقايق لين يبرد الورق
كذا شكلها راح يكون
نقصها بالمقص فوق حدود الورق .. خلي شوية مساحه
واحد من الحدود فالعرض راح نقصه وماراح نترك مساحه يعني من بداية حد الورق ... ونسوي فالنص نصف دائرة عشان نقدر نسحب البطاقة بسهولة