السلام عليكم ورحمة الله وبركاته
عساكم بالف صحة وعافيه
وانا الف بقوقل ادور على حل فكرت وقولت يلا يابت ارمي مشكلتك عندهم يمكن تلاقي الحل
مشكلتي انو ولدي سنه سادس يعني عمره 12 سنه الله يحفظه ويحفظلكم اولادكم يارب
المهم انو قبل فترة انا وابوه ملاحظين عليه انو يتاخر بالحمام وانتو بكرامه فخوفنا انو يكون يبغى يستكشف نفسه
عاد انتو ادرى بذي المرحلة الحساسة (مرحلة البلوغ واللي قبلها )
فقولت لابوه تكلم مع الولد وابدا معاه واساله اذا انو يعرف شئ او يحس شئ خاصة مع الزمان ذا ممكن الواحد يتكلم مع اصحابه او هم يعلموه وتعرفو كيف الواحد بذا السن يكون مسوي انو يعرف وانو خبير ويبدا يتفلسف مع اصحابه وكذا
المهم انو زوجي الحبيب مستحي من ولده
يقولي مو عارف كيف ابدا معاه او اكلمه
وانا مستحيل اتكلم معاه بذي الاشيا العيال على الاب والبنات عليا طبعا هو اكبر اولادي ومالنا خبرة كيف نتعامل معاهم بذا السن
وتعرفو زماااااااان كان غموض والاب مستحيل يتكلم مع عياله والام مستحيل تكلم بناتها
فاحنا مانبغى نكرر نفس الغلط مع اولادنا
فالله يخليكم ويسعدكم اتمنى تعطوني نصائح او طرق استفيد منها في البدايه هوا مررررره منحرج كيف يبدا معاه هي البداية صعبة وبعدين بيكون كل شئ سهل بأذن الله
وسلامتكم